एम्पायर स्टेट बिल्डिङको चुचुरोमा प्रेम प्रस्ताव गरेपछि जोडी पक्राउ

झापा । विश्वप्रसिद्ध एम्पायर स्टेट बिल्डिङको प्रतिबन्धित चुचुरोमा अनुमति बिना चढेर प्रेम प्रस्ताव गरेका एक जोडीलाई अमेरिकी प्रहरीले पक्राउ गरेको छ।

रुसी मूलका एन्जेला निकोलाउ र इभान कुज्नेत्सोभले भवनको सुरक्षानियम उल्लङ्घन गर्दै चुचुरोमा पुगेर प्रेम प्रस्ताव गरेका थिए। उनीहरूले त्यहाँ "प्रेमको शक्ति घृणाभन्दा महान् हुन्छ" भन्ने सन्देश लेखिएको ब्यानरसमेत प्रदर्शन गरेका थिए।

घटनाबारे जानकारी पाएलगत्तै सुरक्षाकर्मी र प्रहरी परिचालन गरिएको थियो। अनुसन्धानपछि दुवै जनाविरुद्ध गैरकानुनी रूपमा प्रतिबन्धित क्षेत्रमा प्रवेश गरेको, सार्वजनिक सुरक्षामा जोखिम सिर्जना गरेको तथा अन्य सम्बन्धित कसुरमा मुद्दा दर्ता गरिएको जनाइएको छ।

यस घटनाको भिडियो सामाजिक सञ्जालमा व्यापक रूपमा फैलिएको छ। तर अमेरिकी अधिकारीहरूले यस्तो जोखिमपूर्ण गतिविधिको नक्कल नगर्न आग्रह गर्दै कानुन र सुरक्षा नियमको पालना गर्न सर्वसाधारणलाई अपिल गरेका छन्।