ᱟᱢᱮᱨᱤᱠᱟ ᱣᱟᱜ ᱟᱨᱦᱚᱸ ᱦᱚᱭ ᱟᱠᱨᱚᱢᱚᱱ ᱛᱟᱭᱚᱢ ᱛᱟᱞᱟ ᱥᱟᱢᱟᱝ ᱨᱮ ᱮᱯᱮᱨᱦᱮᱸᱰ ᱵᱟᱹᱲᱛᱤ ᱮᱱᱟ, ᱠᱩᱣᱮᱛ ᱨᱮ ᱵᱚᱢ ᱯᱷᱩᱴᱟᱹᱣ ᱥᱟᱰᱮ ᱥᱟᱶᱛᱮ ᱥᱟᱭᱨᱮᱱ

ᱟᱥᱟᱲ ᱒᱕ ᱒᱐᱘᱓ ᱾ ᱢᱚᱝᱜᱚᱞ ᱢᱩᱨᱢᱩ ᱾ ᱡᱷᱟᱯᱟ

ᱟᱢᱮᱨᱤᱠᱟ ᱟᱨ ᱤᱨᱟᱱ ᱢᱩᱫᱽ ᱨᱮ ᱮᱯᱮᱨᱦᱮᱸᱰ (ᱛᱟᱱᱟᱣ) ᱟᱨᱦᱚᱸ ᱵᱟᱹᱲᱛᱤ ᱟᱠᱟᱱᱟ ᱾ ᱟᱢᱮᱨᱤᱠᱟ ᱫᱚ ᱤᱨᱟᱱ ᱵᱤᱨᱩᱫᱷ ᱨᱮ ᱟᱨᱦᱚᱸ ᱦᱚᱭ ᱟᱠᱨᱚᱢᱚᱱ (ᱦᱚᱭ ᱞᱟᱹᱰᱷᱟᱹᱭ) ᱠᱟᱛᱮ ᱦᱚᱨᱢᱩᱡᱽ ᱡᱚᱞᱰᱚᱢᱚᱨᱩᱢᱚᱫᱷᱭᱚ (Hormuz Strait) ᱴᱚᱴᱷᱟ ᱨᱮ ᱤᱨᱟᱱ ᱟᱜ ᱢᱤᱞᱤᱴᱟᱨᱤ (ᱯᱷᱟᱹᱫᱽ) ᱫᱟᱲᱮ ᱞᱤᱪᱟᱹᱲ ᱚᱪᱚ ᱨᱮᱱᱟᱜ ᱩᱫᱮᱥ ᱢᱮᱱᱟᱜ ᱛᱟᱭᱟ ᱢᱮᱱᱛᱮ ᱞᱟᱹᱭ ᱟᱠᱟᱫᱟ ᱾

ᱡᱟᱹᱛᱤᱭᱟᱹᱨᱤ ᱟᱨ ᱡᱮᱜᱮᱛᱟᱹᱨᱤ ᱠᱷᱚᱵᱚᱨ ᱠᱚ ᱞᱮᱠᱟᱛᱮ ᱤᱨᱟᱱ ᱨᱮᱱᱟᱜ ᱵᱷᱮᱜᱟᱨ ᱵᱷᱮᱜᱟᱨ ᱵᱟᱡᱟᱨ ᱠᱚᱨᱮ ᱵᱚᱢ ᱵᱟᱨᱩᱫᱽ ᱯᱷᱩᱴᱟᱹᱣ ᱨᱮᱱᱟᱜ ᱠᱷᱚᱵᱚᱨ ᱦᱮᱡ ᱟᱠᱟᱱᱟ ᱾ ᱟᱢᱮᱨᱤᱠᱟ ᱨᱮᱱ ᱫᱤᱥᱚᱢ ᱜᱚᱢᱠᱮ (ᱯᱨᱮᱥᱤᱰᱮᱱᱴ) ᱰᱚᱱᱟᱞᱰ ᱴᱨᱟᱢᱯ ᱫᱚ ᱤᱨᱟᱱ ᱡᱟᱦᱟᱡᱽ ᱠᱚ ᱪᱮᱛᱟᱱ ᱨᱮ ᱟᱨᱦᱚᱸ ᱡᱟᱦᱟᱱ ᱟᱠᱨᱚᱢᱚᱱ ᱞᱮᱠᱷᱟᱱ ᱟᱢᱮᱨᱤᱠᱟ ᱱᱚᱣᱟ ᱠᱷᱚᱱ ᱦᱚᱸ ᱠᱮᱴᱮᱡ ᱢᱤᱞᱤᱴᱟᱨᱤ ᱠᱟᱹᱢᱤᱦᱚᱨᱟ ᱭ ᱥᱟᱵ ᱵᱚᱨᱚᱛᱟ ᱢᱮᱱᱛᱮ ᱦᱩᱥᱤᱭᱟᱹᱨᱤ ᱮ ᱮᱢ ᱟᱠᱟᱫᱟ ᱾

ᱱᱚᱛᱮ, ᱤᱨᱟᱱ ᱯᱟᱦᱴᱟ ᱠᱷᱚᱱ ᱦᱚᱸ ᱨᱩᱣᱟᱹᱲ ᱟᱠᱨᱚᱢᱚᱱ ᱦᱩᱭ ᱫᱟᱲᱮᱭᱟᱜ ᱨᱮᱱᱟᱜ ᱵᱚᱛᱚᱨ ᱛᱮ ᱠᱷᱟᱰᱤ ᱴᱚᱴᱷᱟ (Gulf Region) ᱨᱮᱱᱟᱜ ᱵᱟᱦᱨᱮᱱ ᱟᱨ ᱠᱩᱣᱮᱛ ᱨᱮ ᱟᱹᱰᱤ ᱱᱟᱯᱟᱭ ᱥᱟᱹᱦᱤᱡ ᱥᱟᱣᱫᱷᱟᱱ ᱨᱮ ᱠᱚ ᱛᱟᱦᱮᱸ ᱟᱠᱟᱱᱟ ᱾ ᱦᱚᱭ ᱟᱠᱨᱚᱢᱚᱱ ᱨᱮᱱᱟᱜ ᱵᱚᱛᱚᱨ ᱫᱚ ᱢᱮᱫ ᱢᱟᱨᱟᱝ ᱨᱮ ᱫᱚᱦᱚ ᱠᱟᱛᱮ ᱚᱸᱰᱮ ᱜᱷᱟᱱᱮ ᱜᱷᱟᱱᱮ ᱦᱚᱭ ᱵᱚᱛᱚᱨ ᱥᱟᱞᱟᱜ ᱡᱚᱲᱟᱣ ᱟᱠᱟᱱ ᱥᱟᱭᱨᱮᱱ (Siren) ᱵᱟᱡᱟᱣ ᱟᱠᱟᱱ ᱢᱮᱱᱛᱮ ᱞᱟᱹᱭ ᱟᱠᱟᱱᱟ ᱾

ᱱᱤᱭᱟᱹ ᱢᱩᱫᱽ ᱨᱮ ᱚᱱᱰᱮᱱᱟᱜ ᱚᱠᱛᱚ ᱞᱮᱠᱟᱛᱮ ᱥᱮᱛᱟᱜ ᱟᱢᱫᱟᱡᱽ ᱔ ᱴᱟᱲᱟᱝ (ᱵᱟᱡᱮ) ᱥᱮᱫ ᱠᱩᱣᱮᱛ ᱨᱮ ᱥᱟᱭᱨᱮᱱ ᱥᱟᱶᱛᱮ ᱟᱹᱰᱤ ᱢᱟᱨᱟᱝ ᱵᱚᱢ ᱯᱷᱩᱴᱟᱹᱣ ᱨᱮᱱᱟᱜ ᱥᱟᱰᱮ ᱟᱸᱡᱚᱢ ᱟᱠᱟᱱ ᱠᱷᱚᱵᱚᱨ ᱧᱟᱢ ᱟᱠᱟᱱᱟ ᱾ ᱮᱱᱛᱮ ᱨᱮᱦᱚᱸ ᱚᱱᱟ ᱵᱚᱢ ᱯᱷᱩᱴᱟᱹᱣ ᱨᱮᱱᱟᱜ ᱚᱡᱮ ᱟᱨ ᱚᱱᱟ ᱛᱮ ᱦᱩᱭ ᱟᱠᱟᱱ ᱠᱷᱩᱛᱤ ᱨᱮᱱᱟᱜ ᱥᱟᱹᱨᱤ ᱰᱚᱜᱚᱨ (ᱥᱚᱨᱠᱟᱨᱤ ᱯᱩᱥᱴᱟᱹᱣ) ᱫᱚ ᱱᱤᱛ ᱦᱟᱹᱵᱤᱡ ᱵᱟᱝ ᱦᱩᱭ ᱟᱠᱟᱱᱟ ᱾

ᱮᱯᱮᱨᱦᱮᱸᱰ (ᱛᱟᱱᱟᱣ) ᱵᱟᱹᱲᱛᱤ ᱤᱫᱤ ᱞᱮᱱᱠᱷᱟᱱ ᱛᱟᱞᱟ ᱥᱟᱢᱟᱝ (Middle East) ᱴᱚᱴᱷᱟ ᱨᱮᱱᱟᱜ ᱨᱩᱠᱷᱤᱭᱟᱹ ᱵᱮᱵᱚᱥᱛᱟ ᱟᱨᱦᱚᱸ ᱟᱹᱣᱡᱷᱟᱹᱣ ᱜᱮ ᱵᱮᱱᱟᱣ ᱫᱟᱲᱮᱭᱟᱜᱼᱟ ᱢᱮᱱᱛᱮ ᱡᱮᱜᱮᱛᱟᱹᱨᱤ ᱜᱟᱶᱛᱟ ᱠᱚ ᱱᱚᱣᱟ ᱜᱷᱚᱴᱚᱱ ᱫᱚ ᱥᱩᱨ ᱠᱷᱚᱱ ᱠᱚ ᱧᱮᱞ ᱠᱚᱭᱚᱜ ᱟᱠᱟᱫᱟ ᱾