पाकिस्तानी हवाई आक्रमणमा अफगानिस्तानमा ३६ सर्वसाधारणको मृत्यु, १६० भन्दा बढी घाइते

झापा । अफगानिस्तानमा पाकिस्तानी सेनाले गरेको हवाई आक्रमणमा परी कम्तीमा ३६ सर्वसाधारणको मृत्यु भएको छ भने १६० भन्दा बढी व्यक्ति घाइते भएका छन्।

अफगानिस्तानका अधिकारीहरूका अनुसार आक्रमणमा महिला तथा बालबालिकासमेत प्रभावित भएका छन्। घाइतेहरूको विभिन्न अस्पतालमा उपचार भइरहेको छ, जसका कारण मृतक संख्या अझै बढ्न सक्ने आशंका गरिएको छ।

यता पाकिस्तानले भने उक्त हवाई कारबाही उग्रवादी समूहका ठेगानालाई लक्षित गरेर सञ्चालन गरिएको दाबी गरेको छ। पाकिस्तानले सर्वसाधारणलाई निशाना नबनाइएको जनाएको छ।

घटनापछि दुवै देशबीचको तनाव थप चर्किएको छ। घटनाबारे थप विवरण आउने क्रम जारी रहेको अन्तर्राष्ट्रिय सञ्चारमाध्यमहरूले जनाएका छन्।