ᱤᱵᱳᱞᱟ ᱥᱚᱝᱠᱨᱚᱢᱚᱱ ᱵᱟᱹᱲᱛᱤᱜ ᱠᱟᱱᱟ, ᱜᱩᱡᱩᱜ ᱦᱚᱲ ᱮᱞ ᱑᱓᱑ ᱛᱮ ᱥᱮᱴᱮᱨ ᱮᱱᱟ

ᱥᱚᱨᱠᱟᱨ ᱵᱟᱥᱠᱮ

ᱚᱯᱷᱨᱤᱠᱟ ᱨᱮᱱᱟᱜ ᱠᱤᱪᱷᱩ ᱮᱞᱟᱠᱟ ᱨᱮ ᱯᱟᱥᱱᱟᱣ ᱟᱠᱟᱱ ᱤᱵᱳᱞᱟ ᱵᱷᱟᱭᱨᱟᱥ ᱥᱚᱝᱠᱨᱚᱢᱚᱱ ᱟᱹᱰᱤ ᱩᱥᱟᱹᱨᱟ ᱯᱟᱥᱱᱟᱣ ᱮᱦᱚᱵ ᱟᱠᱟᱱ ᱛᱮ ᱡᱮᱜᱮᱛ ᱥᱟᱶᱟᱨ ᱜᱟᱶᱛᱟ (WHO) ᱫᱚ ᱱᱚᱶᱟ "ᱚᱱᱛᱚᱨᱟᱥᱴᱨᱤᱭᱚ ᱡᱚᱱᱚᱥᱣᱟᱥᱛᱷᱚ ᱟᱯᱚᱛᱠᱟᱞ" (Public Health Emergency of International Concern - PHEIC) ᱢᱮᱱᱛᱮ ᱜᱷᱳᱥᱳᱱᱟ ᱟᱠᱟᱫᱟ ᱾ ᱵᱷᱮᱜᱟᱨ ᱠᱟᱛᱮ Democratic Republic of the Congo ᱟᱨ Uganda ᱨᱮ ᱯᱟᱥᱱᱟᱣ ᱟᱠᱟᱱ ᱫᱩᱨᱞᱚᱵᱷ "ᱵᱩᱱᱰᱤᱵᱩᱜᱽᱭᱳ" (Bundibugyo) ᱥᱴᱨᱮᱱ ᱠᱟᱨᱚᱱ ᱛᱮ ᱱᱤᱛ ᱫᱷᱟᱹᱵᱤᱡ ᱠᱚᱢ ᱠᱟᱛᱮ ᱦᱚᱸ ᱑ ᱡᱚᱱᱟ ᱠᱚ ᱜᱩᱨ ᱟᱠᱟᱱᱟ ᱢᱮᱱᱛᱮ ᱟᱱᱛᱚᱨᱨᱟᱥᱴᱨᱤᱭᱚ ᱠᱷᱚᱵᱚᱨ ᱠᱚ ᱞᱟᱹᱭ ᱟᱠᱟᱫᱟ ᱾

ᱧᱟᱢ ᱟᱠᱟᱱ ᱵᱤᱵᱚᱨᱚᱱ ᱞᱮᱠᱟᱛᱮ ᱕ ᱥᱟᱭ ᱠᱷᱚᱱ ᱵᱟᱹᱲᱛᱤ ᱥᱚᱝᱠᱟᱥᱯᱚᱫ ᱥᱚᱝᱠᱨᱳᱢᱤᱛ ᱠᱚ ᱧᱟᱢ ᱟᱠᱟᱱᱟ ᱟᱨ ᱥᱚᱝᱠᱨᱚᱢᱚᱱ ᱥᱤᱢᱟᱹ ᱮᱞᱟᱠᱟ ᱯᱟᱨᱚᱢ ᱠᱟᱛᱮ ᱮᱴᱟᱜ ᱴᱷᱟᱶ ᱠᱚᱨᱮ ᱦᱚᱸ ᱯᱟᱥᱱᱟᱣ ᱮᱦᱚᱵ ᱟᱠᱟᱱᱟ ᱾ ᱱᱚᱶᱟ ᱫᱩᱨᱞᱚᱵᱷ ᱥᱴᱨᱮᱱ ᱞᱟᱹᱜᱤᱫ ᱱᱤᱛ ᱫᱷᱟᱹᱵᱤᱡ ᱥᱣᱤᱠᱨᱤᱛ ᱴᱤᱠᱟᱹ (Khop) ᱵᱟᱝᱠᱷᱟᱱ ᱵᱷᱮᱜᱟᱨ ᱛᱤᱠᱤᱪᱷᱟ ᱵᱟᱹᱱᱩᱜᱼᱟ ᱢᱮᱱᱛᱮ WHO ᱞᱟᱹᱭ ᱟᱠᱟᱫᱟ ᱾

WHO ᱨᱮᱱ ᱢᱚᱦᱟᱱᱤᱫᱮᱥᱚᱠ Tedros Adhanom Ghebreyesus ᱫᱚ ᱥᱚᱝᱠᱨᱚᱢᱚᱱ ᱨᱮᱱᱟᱜ ᱜᱚᱛᱤ ᱟᱨ ᱯᱟᱥᱱᱟᱣ ᱟᱹᱰᱤ ᱪᱤᱱᱛᱟᱹ ᱜᱮᱭᱟ ᱢᱮᱱᱛᱮ ᱞᱟᱹᱭ ᱟᱛᱮ ᱡᱮᱜᱮᱛ ᱡᱟᱠᱟᱛ ᱥᱟᱶᱛᱟ ᱠᱚ ᱥᱚᱱᱛᱚᱨ ᱛᱟᱦᱮᱸᱱ ᱞᱟᱹᱜᱤᱫ ᱮ ᱟᱹᱨᱡᱤ ᱟᱠᱟᱫᱟ ᱾ ᱢᱮ ᱑᱖ ᱨᱮ WHO ᱫᱚ ᱱᱚᱶᱟ ᱯᱨᱚᱠᱳᱯ ᱫᱚ PHEIC ᱜᱷᱳᱥᱳᱱᱟ ᱨᱮᱱᱟᱜ ᱱᱤᱥᱯᱚᱛᱤ ᱮ ᱦᱟᱛᱟᱣ ᱞᱮᱫᱟ, ᱡᱟᱦᱟᱸ ᱨᱮᱱᱟᱜ ᱥᱟᱨᱵᱚᱡᱚᱱᱤᱠ ᱜᱷᱳᱥᱳᱱᱟ ᱢᱮ ᱑᱗ ᱨᱮ ᱦᱩᱭ ᱟᱠᱟᱱᱟ ᱾

ᱥᱟᱶᱟᱨ ᱵᱤᱥᱮᱥᱚᱜᱽᱭᱚ ᱠᱚ ᱞᱮᱠᱟᱛᱮ ᱤᱵᱳᱞᱟ ᱫᱚ ᱥᱚᱝᱠᱨᱳᱢᱤᱛ ᱦᱚᱲ ᱟᱜ ᱢᱟᱭᱟᱢ, ᱩᱫᱽᱜᱟᱹᱨ ᱫᱟᱜ, ᱩᱞᱟᱹ ᱟᱨ ᱮᱴᱟᱜ ᱦᱚᱲᱢᱚ ᱨᱮᱱᱟᱜ ᱛᱚᱨᱚᱞ ᱯᱚᱫᱟᱨᱛᱷᱚ ᱠᱚᱣᱟᱜ ᱥᱟᱢᱟᱝᱼᱥᱟᱢᱟᱝ (direct contact) ᱡᱚᱴᱮᱫ ᱛᱮ ᱯᱟᱥᱱᱟᱣᱜᱼᱟ ᱾ ᱨᱩᱣᱟᱹ, ᱠᱚᱢᱡᱳᱨᱤ, ᱩᱞᱟᱹ, ᱡᱷᱟᱲᱟᱯᱚᱠᱷᱟᱞᱟ ᱟᱨ ᱢᱟᱭᱟᱢ ᱚᱰᱳᱠᱚᱜ ᱫᱚ ᱱᱚᱶᱟ ᱨᱮᱱᱟᱜ ᱢᱩᱞ ᱞᱚᱠᱪᱷᱚᱱ ᱠᱟᱱᱟ ᱾

ᱤᱵᱳᱞᱟ ᱠᱷᱚᱱ ᱵᱟᱧᱪᱟᱣ ᱨᱮᱱᱟᱜ ᱩᱯᱟᱹᱭ:

• ᱥᱟᱵᱚᱱ ᱫᱟᱜ ᱛᱮ ᱱᱤᱭᱚᱢᱤᱛ ᱞᱮᱠᱟᱛᱮ ᱛᱤ ᱟᱹᱨᱩᱵ ᱢᱮ ᱾

• ᱨᱩᱣᱟᱹ ᱦᱚᱲ ᱟᱜ ᱦᱚᱲᱢᱚ ᱨᱮᱱᱟᱜ ᱛᱚᱨᱚᱞ ᱯᱚᱫᱟᱨᱛᱷᱚ ᱡᱚᱴᱮᱫ ᱠᱷᱚᱱ ᱥᱟᱦᱟ ᱨᱮ ᱛᱟᱦᱮᱸᱱ ᱢᱮ ᱾

• ᱢᱟᱥᱠ ᱟᱨ ᱥᱩᱨᱚᱠᱥᱟᱛᱢᱚᱠ ᱥᱟᱢᱟᱜᱽᱨᱤ ᱵᱮᱵᱷᱟᱨ ᱢᱮ ᱾

• ᱵᱤᱨ ᱡᱤᱣᱟᱹᱞᱤ ᱠᱚᱣᱟᱜ ᱵᱟᱝ ᱥᱩᱨᱚᱠᱥᱤᱛ ᱡᱤᱞ ᱟᱞᱳ ᱯᱮ ᱡᱚᱢᱼᱟ ᱾

• ᱨᱩᱣᱟᱹ, ᱩᱞᱟᱹ ᱵᱟᱝᱠᱷᱟᱱ ᱢᱟᱭᱟᱢ ᱚᱰᱳᱠᱚᱜ ᱞᱮᱠᱟᱱ ᱞᱚᱠᱷᱚᱱ ᱧᱮᱞ ᱞᱮᱱᱠᱷᱟᱱ ᱩᱥᱟᱹᱨᱟ ᱥᱟᱶᱟᱨ ᱜᱟᱶᱛᱟ (Hospital) ᱨᱮ ᱵᱤᱰᱟᱹᱣ ᱚᱪᱚᱭ ᱢᱮ ᱾

ᱥᱟᱶᱟᱨ ᱵᱤᱥᱮᱥᱚᱜᱽᱭᱚ ᱠᱚ ᱫᱚ ᱮᱲᱮ ᱠᱷᱚᱵᱚᱨ ᱟᱨ ᱵᱷᱨᱟᱢᱚᱠ ᱥᱩᱪᱚᱱᱟ ᱠᱚᱨᱮ ᱵᱟᱝ ᱯᱟᱹᱛᱭᱟᱹᱣ ᱞᱟᱹᱜᱤᱫ ᱟᱨ ᱟᱹᱭᱫᱟᱹᱨᱤ ᱟᱱᱟᱜ ᱥᱟᱶᱟᱨ ᱱᱤᱠᱟᱭ ᱠᱷᱚᱱ ᱡᱟᱹᱨᱤ ᱟᱠᱟᱱ ᱥᱩᱪᱚᱱᱟ ᱠᱚ ᱜᱮ ᱢᱩᱞ ᱵᱟᱱᱟᱣ ᱞᱟᱹᱜᱤᱫ ᱠᱚ ᱟᱹᱨᱡᱤ ᱟᱠᱟᱫᱟ ᱾ ᱩᱱᱠᱩ ᱞᱮᱠᱟᱛᱮ ᱡᱚᱱᱚᱪᱮᱛᱚᱱᱟ, ᱥᱟᱯᱷᱟᱼᱥᱟᱹᱯᱷᱤ ᱟᱨ ᱥᱟᱛᱟᱨᱠᱟ ᱜᱮ ᱤᱵᱳᱞᱟ ᱟᱴᱠᱟᱣ ᱨᱮᱱᱟᱜ ᱡᱚᱛᱚ ᱠᱷᱚᱱ ᱯᱨᱚᱵᱷᱟᱣᱠᱟᱨᱤ ᱩᱯᱟᱹᱭ ᱠᱟᱱᱟ ᱾