ᱜᱟ.ᱣᱨᱤᱜᱚᱸᱡᱽ–᱑ ᱨᱮ ᱢᱮᱱᱟᱜ ᱤᱱᱫᱽᱨᱮᱬᱤ ᱟᱥᱲᱟ ᱨᱮ ᱥᱚᱱᱛᱷᱟᱞᱤ ᱯᱟᱹᱨᱥᱤ ᱟᱠᱷᱲᱟ ᱮᱦᱚᱵ, ᱟᱥᱲᱟ ᱯᱟᱦᱴᱟ ᱠᱷᱚᱱ ᱯᱩᱨᱟᱹ ᱜᱚᱲᱚ ᱛᱟᱦᱮᱸᱱᱟ
ᱟᱥᱟᱲ ᱒᱗ | ᱥᱤᱵᱩ ᱢᱩᱢᱩ |ᱡᱷᱟᱯᱟ, ᱜᱟ.ᱣᱨᱤᱜᱚᱸᱡᱽ ।
ᱡᱷᱟᱯᱟ ᱡᱮᱞᱟ ᱨᱮᱱᱟᱜ ᱜᱟ.ᱣᱨᱤᱜᱚᱸᱡᱽ ᱜᱟᱶᱯᱟᱞᱤᱠᱟ–᱑ ᱢᱚᱦᱟᱵᱷᱟᱨᱟ ᱨᱮ ᱢᱮᱱᱟᱜ ᱤᱱᱫᱽᱨᱮᱬᱤ ᱵᱩᱱᱤᱭᱟᱹᱫᱽ ᱟᱥᱲᱟ (ᱤᱱᱫᱽᱨᱮᱬᱤ ᱟᱫᱷᱟᱨᱵᱷᱩᱛ ᱵᱤᱫᱽᱭᱟᱞᱚᱭ) ᱨᱮ ᱥᱚᱱᱛᱷᱟᱞᱤ ᱯᱟᱹᱨᱥᱤ ᱛᱮ ᱚᱞ-ᱯᱟᱲᱦᱟᱣ ᱦᱩᱭᱩᱜ ᱠᱟᱱ ᱵᱟᱰᱟᱭ ᱧᱟᱢ ᱮᱱ ᱛᱟᱭᱚᱢ ᱟᱥᱲᱟ ᱥᱟᱥᱚᱱ ᱯᱟᱦᱴᱟ ᱠᱷᱚᱱ ᱱᱚᱣᱟ ᱠᱟᱹᱢᱤ ᱞᱮᱛᱟᱲ ᱜᱚᱲᱚ ᱮᱢᱚᱜ ᱨᱮᱱᱟᱜ ᱠᱤᱨᱤᱭᱟᱹ ᱠᱚ ᱦᱟᱛᱟᱣ ᱟᱠᱟᱫᱟ ᱾
ᱟᱥᱲᱟ ᱨᱤᱱᱤᱡ ᱢᱟᱨᱟᱝ ᱢᱟᱪᱮᱛ ᱥᱤᱵᱚ ᱠᱩᱢᱟᱨ ᱢᱚᱭᱱᱟᱞᱤ ᱮ ᱩᱭᱦᱟᱹᱨ ᱠᱮᱫᱟ ᱡᱮ ᱢᱟᱲᱟᱝ ᱥᱮᱨᱢᱟ ᱵᱟᱨ ᱜᱮᱞ ᱥᱮ ᱜᱮᱞ ᱢᱤᱫ ᱥᱮᱨᱢᱟ ᱞᱟᱦᱟ ᱨᱮ ᱟᱥᱲᱟ ᱨᱮ ᱥᱚᱱᱛᱷᱟᱞᱤ ᱯᱟᱹᱨᱥᱤ ᱛᱮ ᱯᱟᱲᱦᱟᱣ ᱮᱦᱚᱵ ᱞᱟᱹᱜᱤᱫ ᱠᱩᱨᱩᱢᱩᱴᱩ ᱞᱮᱫ ᱛᱟᱦᱮᱸᱫ ᱟᱨ ᱞᱟᱹᱠᱛᱤᱭᱟᱱ ᱯᱩᱛᱷᱤ ᱠᱚᱦᱚᱸ ᱟᱹᱜᱩ ᱞᱮᱫ ᱛᱟᱦᱮᱸᱫ, ᱢᱮᱱᱠᱷᱟᱱ ᱵᱷᱮᱜᱟᱨ ᱵᱷᱮᱜᱟᱨ ᱠᱟᱨᱚᱱ ᱛᱮ ᱵᱟᱝ ᱥᱟᱹᱛ ᱞᱮᱱ ᱛᱟᱦᱮᱸᱫ ᱾
ᱡᱟᱹᱨᱩᱢ ᱢᱟᱦᱟᱸ ᱥᱮᱛᱟᱜ ᱯᱩᱞᱩ ᱛᱨᱳᱭᱢᱟᱥᱤᱠ (First Quarterly) ᱵᱤᱱᱤᱰ ᱨᱮᱱᱟᱜ ᱠᱩᱠᱞᱤ ᱥᱟᱠᱟᱢ ᱵᱮᱱᱟᱣ ᱟᱨ ᱯᱟᱹᱴᱷᱩᱣᱟᱹ ᱠᱚᱣᱟᱜ ᱯᱳᱨᱴᱯᱷᱳᱞᱤᱭᱳ ᱢᱩᱞᱭᱟᱸᱠᱚᱱ ᱞᱟᱹᱜᱤᱫ ᱟᱥᱲᱟ ᱛᱮ ᱥᱮᱴᱮᱨ ᱞᱮᱱ ᱢᱟᱨᱟᱝ ᱢᱟᱪᱮᱛ ᱫᱚ ᱟᱥᱲᱟ ᱪᱷᱟᱴᱠᱟ ᱨᱮᱜᱮ ᱥᱚᱱᱛᱷᱟᱞᱤ ᱯᱟᱹᱨᱥᱤ ᱟᱠᱷᱲᱟ ᱪᱟᱞᱟᱜ ᱠᱟᱱ ᱧᱮᱞ ᱠᱟᱛᱮ ᱟᱹᱰᱤ ᱨᱟᱹᱥᱠᱟᱹ ᱮ ᱥᱚᱫᱚᱨ ᱠᱮᱫᱟ ᱾
ᱩᱱᱤᱭᱟᱜ ᱞᱟᱹᱭ ᱞᱮᱠᱟᱛᱮ, ᱢᱤᱫ ᱚᱠᱛᱚ ᱱᱚᱣᱟ ᱟᱥᱲᱟ ᱨᱮᱜᱮ ᱠᱞᱟᱥ ᱑/᱒ ᱨᱮ ᱯᱟᱲᱦᱟᱣ ᱞᱮᱱ ᱢᱟᱨᱮ ᱯᱟᱹᱴᱷᱩᱣᱟᱹ ᱥᱭᱟᱢ ᱦᱮᱢᱵᱽᱨᱚᱢ ᱫᱚ ᱱᱤᱛᱚᱜ ᱤᱧᱡᱤᱱᱤᱭᱟᱹᱨᱤᱝ ᱯᱟᱲᱦᱟᱣ ᱥᱟᱶ-ᱥᱟᱶᱛᱮ ᱟᱡᱟᱜ ᱡᱟᱱᱟᱢ ᱯᱟᱹᱨᱥᱤ ᱵᱟᱧᱪᱟᱣ ᱟᱨ ᱞᱟᱦᱟᱱᱛᱤ ᱞᱟᱹᱜᱤᱫ ᱟᱡ ᱛᱮᱜᱮ ᱜᱚᱲᱚ ᱮᱢᱚᱜ ᱜᱟᱞᱚᱪᱤᱭᱟᱹ ᱞᱮᱠᱟᱛᱮ ᱥᱚᱱᱛᱷᱟᱞᱤ ᱯᱟᱹᱨᱥᱤ ᱨᱮᱱᱟᱜ ᱚᱞ ᱟᱨ ᱯᱟᱲᱦᱟᱣ ᱮ ᱠᱟᱹᱢᱤ ᱠᱟᱱᱟ ᱾ ᱜᱟᱞᱚᱪᱤᱭᱟᱹ (सहजकर्ता) ᱞᱮᱠᱟᱛᱮ ᱡᱚᱛᱚ ᱛᱮ ᱓᱔ ᱦᱚᱲ ᱯᱟᱹᱴᱷᱩᱣᱟᱹ ᱢᱮᱱᱟᱜ ᱠᱚᱣᱟ ᱟᱨ ᱱᱤᱛ ᱦᱟᱹᱵᱤᱡ ᱛᱮ ᱓ ᱠᱞᱟᱥ (Class 3) ᱦᱟᱹᱵᱤᱡ ᱠᱚ ᱚᱞ ᱪᱤᱠᱤ ᱟᱠᱷᱚᱨ ᱛᱮ ᱯᱟᱲᱦᱟᱣ ᱟᱠᱟᱫ ᱠᱚᱣᱟ ᱾
ᱱᱚᱣᱟ ᱠᱟᱹᱢᱤ ᱨᱮᱱᱟᱜ ᱥᱟᱨᱦᱟᱣ ᱠᱟᱛᱮ ᱟᱥᱲᱟ ᱯᱟᱦᱴᱟ ᱠᱷᱚᱱ ᱥᱚᱱᱛᱷᱟᱞᱤ ᱯᱟᱹᱨᱥᱤ ᱟᱠᱷᱲᱟ ᱞᱮᱛᱟᱲ ᱫᱚᱦᱚ ᱞᱟᱹᱜᱤᱫ ᱞᱟᱹᱠᱛᱤᱭᱟᱱ ᱜᱚᱲᱚ ᱮᱢᱚᱜ ᱨᱮᱱᱟᱜ ᱮ ᱵᱤᱠᱷᱟᱹᱣ ᱠᱮᱫᱟ ᱾ ᱟᱥᱲᱟ ᱫᱚ ᱥᱮᱪᱮᱫ ᱨᱮ ᱥᱮᱞᱮᱫ ᱟᱠᱟᱱ ᱯᱟᱹᱴᱷᱩᱣᱟᱹ ᱠᱚ ᱞᱟᱹᱜᱤᱫ ᱞᱟᱹᱠᱛᱤᱭᱟᱱ ᱥᱴᱮᱥᱚᱱᱟᱨᱤ ᱡᱤᱱᱤᱥ ᱠᱚ, ᱜᱟᱞᱚᱪᱤᱭᱟᱹ ᱞᱟᱹᱜᱤᱫ ᱚᱞ-ᱯᱟᱲᱦᱟᱣ ᱨᱮ ᱞᱟᱹᱠᱛᱤᱭᱟᱱ ᱥᱮᱪᱮᱫ ᱡᱤᱱᱤᱥ ᱠᱚ ᱟᱨ ᱡᱚᱢ-ᱧᱩ ᱵᱷᱟᱛᱟ ᱨᱮᱱᱟᱜ ᱵᱮᱵᱚᱥᱛᱟ ᱠᱚ ᱮᱢᱚᱜ-ᱟ ᱢᱮᱱᱛᱮ ᱞᱟᱹᱭ ᱟᱠᱟᱫᱟ ᱾
ᱟᱥᱲᱟ ᱥᱟᱥᱚᱱ ᱯᱟᱦᱴᱟ ᱠᱷᱚᱱ ᱡᱟᱱᱟᱢ ᱯᱟᱹᱨᱥᱤ ᱵᱟᱧᱪᱟᱣ ᱟᱨ ᱞᱟᱦᱟᱱᱛᱤ ᱞᱟᱹᱜᱤᱫ ᱦᱩᱭ ᱟᱠᱟᱱ ᱱᱚᱣᱟ ᱠᱩᱨᱩᱢᱩᱴᱩ ᱫᱚ ᱟᱹᱰᱤ ᱱᱟᱯᱟᱭ ᱟᱨ ᱥᱟᱨᱦᱟᱣ ᱟᱱᱟᱜ ᱠᱟᱱᱟ ᱢᱮᱱᱛᱮ ᱞᱟᱹᱭ ᱠᱟᱛᱮ, ᱜᱟᱯᱟ ᱫᱤᱱ ᱨᱮᱦᱚᱸ ᱞᱟᱹᱠᱛᱤᱭᱟᱱ ᱜᱚᱲᱚ ᱟᱨ ᱜᱚᱯᱚᱲᱚ ᱞᱟᱹᱜᱤᱫ ᱥᱟᱨᱟ ᱜᱷᱟᱹᱲᱤ ᱛᱟᱦᱮᱸᱱ ᱨᱮᱱᱟᱜ ᱠᱤᱨᱤᱭᱟᱹ ᱠᱚ ᱥᱚᱫᱚᱨ ᱟᱠᱟᱫᱟ ᱾
ᱢᱟᱨᱟᱝ ᱢᱟᱪᱮᱛ ᱫᱚ ᱜᱟᱞᱚᱪᱤᱭᱟᱹ ᱥᱭᱟᱢ ᱦᱮᱢᱵᱽᱨᱚᱢ ᱜᱚᱢᱠᱮ ᱛᱟᱹᱠᱤᱱ ᱡᱤᱛᱠᱟᱹᱨ ᱨᱮᱱᱟᱜ ᱡᱚᱦᱟᱨ ᱟᱨ ᱥᱟᱭ-ᱥᱟᱭ ᱥᱟᱨᱦᱟᱣ ᱮᱢ ᱠᱟᱛᱮ ᱱᱚᱣᱟ ᱠᱟᱹᱢᱤ ᱦᱚᱨᱟ ᱫᱚ ᱟᱹᱰᱤ ᱫᱤᱱ ᱦᱟᱹᱵᱤᱡ ᱛᱟᱦᱮᱸ ᱠᱚᱜ ᱢᱟ ᱢᱮᱱᱛᱮ ᱟᱥᱟ ᱮ ᱫᱚᱦᱚ ᱠᱮᱫᱟ ᱾
खबर पढेर तपाईलाई कस्तो महसुस भयो ?
प्रतिकृयाहरू (0)
तपाईंले प्रतिकृया दिन लगइन गर्नुपर्छ।
लगइन गर्नुहोस्